PACO名人會——向垃圾食物Say No 唐安麒教你健康飲酒法

「瘦身教主」唐安麒（Angel）認為「健康」先要從飲食着手，她向來崇尚天然，每天都吃很多新鮮的食物，水果蔬菜更不少得。健康的頭號殺手絕對是即食麵，她稱這些「垃圾」吃了可飽肚，但資料顯示，肝臟分解一包即食麵需時二十幾天，是天文數字。除此之外，亦要向含有防腐劑和添加劑的食品SayNo。雖然她吃得健康，但飲酒應酬少不免，她習慣飲酒時送鮮榨果汁，她坦言：「我飲一滿杯嘅Tequila，會配一大樽嘅鮮榨橙汁，第二日我覺得靚到不得了。」喜歡飲威士忌的我，聽到後也很開心，並決定即日實行。

戒吃即食麵

即食麵對大眾來說，真是普遍到不得了，因為香港人生活繁忙，食唔定時，所以即食麵是某些人生活的一部份。自三年前遇上唐安麒，她提點我不要即食麵，我立心戒掉，除非不得已，我都不會吃。

「其實呢個唔係我發明，即食麵嘅壞處已經存在咗好耐，我唔想得罪人，驚出嚟俾人打，但食呢啲同食垃圾無分別，係可以飽肚，但完全無益。資料顯示，完全消化、分解一包即食麵，肝臟需要二十幾日嘅時間，所以飲食嘅重點係要食啲天然嘅嘢，例如香港人好鍾意食火腿香腸即食麵，呢個組合對我自然療法嚟講係毒素，但我相信男人鍾意食，好多細路都鍾意食，但我希望為咗小朋友嘅健康盡量唔好食，如果去茶餐廳，其實你可以叫一個牛肉通粉，起碼牛肉係新鮮嘅，通粉好多時又唔需要油炸，比起即食麵壞處少好多。」

放入口最緊要新鮮

除此之外，在巿場上有不少罐頭和包裝食品，看似簡單方便，但原來都是不要得。即使是那些稱為純天然的果汁，或是無糖的烏龍茶，當中所含的防腐劑均對身體無益。至於怎樣能食得健康，都是離不開「新鮮」兩個字。

「其實飲品都係一個問題，好多時大家鍾意飲罐裝汽水，但我話呢啲係毒水，有啲人問我飲支百分百嘅乜乜先生，又或者飲樽無糖嘅烏龍茶得唔得呢？我成日話，你試吓將鮮榨果汁或泡一個烏龍茶放入個樽度擺喺枱，一個禮拜之後會點？發晒霉喇，點解嗰啲可以擺一年，因為有防腐劑、添加劑。咁究竟要食啲咩，其實好簡單，係新鮮自然嘅就得，好似我鍾意食西餐，可以食一個新鮮嘅沙律，如果喺街食，食一個切雞飯先算，起碼雞同飯都係新鮮，但餐肉同罐頭沙甸魚盡量唔好，以前打仗無嘢食，呢啲罐頭、包裝食品可以救你嘅命，但今時今日有得選擇，點解唔揀啲好嘢食呢！」

果汁與酒互溝養顏

唐安麒貴為國際集團的主席，生意應酬一定有，有時不免亦要飲吓酒，不過要解酒，她有一套獨門的方法，只要跟住做，原來飲酒是可以養顏的。

「我教過一個朋友，佢日日都要飲酒，因為成日都有應酬，其實只要飲酒嘅同時飲埋鮮榨果汁就可以，好似我自己都會，間中有應酬，我會飲烈酒，如Tequila或Vodka，但我一定跟鮮榨嘅橙汁一齊飲，咁樣飲完，第二日我話你聽靚到不得了，因為去咗啲水腫，所以飲酒分分鐘可以養顏。」

快步行身心皆有益

除了飲食之外，KeepFit是女性的終生使命，19歲創業的唐安麒，打理生意26載，但現在還保養得很好，皆因十幾歲時曾當過教練的她，有套與別不同的KeepFit方法。

「我教過跳舞、舉重同健身，所以我對運動好熟悉，但有一樣嘢記住千祈唔好做，就係跑步，你一定話跑步好健康，但我希望你係快步行，呢個係我好多年前推廣，但神奇地之後好多研究報告出咗嚟，都話跑步對關節同身體唔好，反而快步行係一個好好嘅運動，加埋游水同瑜伽。記得幾年前曾經有一個諾貝爾獎，幾個教授講到人嘅抗氧化健康之道，就係食多啲新鮮蔬菜同做瑜伽、快步行呢啲運動，當時佢哋攞獎時分享咗呢篇文章，我睇到毛管戙，證明我一直推廣嘅嘢係啱嘅。」