秋天是大閘蟹季，蟹迷已蠢蠢欲動好耐。香港人鍾意食大閘蟹，韓國人則不分季節，愛食醬油蟹。醬油蟹經蔥、蒜、秘製醬汁醃製，一點也不帶腥，蟹膏橙橙紅紅閃閃發光如啫喱，濃郁甘香十級鮮甜。

不過無論是大閘蟹、韓國醬油蟹，甚或是潮州凍蟹、醉蟹、日本長腳蟹等，是蟹身或是蟹膏也好，整隻蟹的性質本屬非常寒濕，屬發物。醬油蟹及醉蟹未經煮熟，寒性更重，進食等同濕邪直接入侵身體，傷脾胃。蟹身中央有一個白色六角形的蟹胃，更屬極寒涼之物。如果本身屬陰性體質或腸胃弱的人士，食後容易寒濕入侵，出現胃感不適、腹痛、腹脹、嘔吐、暈眩，部分人更可能皮膚敏感。

根據中醫理論的陰陽學說，人體必須保持體內的陰陽動態平衡，才能維持健康的生理狀態。因此，寒性的食物和病症，要配以溫熱性的食物中和。潮州人食凍蟹時，會蘸性質溫熱的薑米醋；韓國人食蟹油蟹，更會煮一大鍋的豬肉辣泡菜豆腐湯，再加一支韓國燒酒殺菌驅寒。香港人食大閘蟹，則習慣飯後飲杯熱薑茶暖胃。薑性溫熱，味辛，《本草綱目》謂：「生用發散，熟用和中」，意指薑生吃有助於發散體內所蘊藏的風寒，熟食則能暖胃止嘔，增強免疫力。食蟹後飲一杯熱薑茶，能即時驅風散寒。

薑茶能驅除蟹的寒濕，但切忌飲用過量。如果本身體質偏燥熱，飲用過多或會傷陰助火，出現手腳心熱、心煩、面部發紅發熱、皮膚暗啞、大便乾燥、口乾咽痛等陰虛火旺症狀。煮薑茶時可保留生薑皮同煮。薑肉熱、薑皮涼，兩者同煮能避免薑茶過於燥熱。

薑茶以外，食大閘蟹時還會飲中式花雕來驅寒。花雕酒是黃酒，以糯米釀製而成。糯米溫熱，益肺氣、養胃健脾；中醫則指黃酒有「通血脈、禦寒氣、行藥勢」的效果。不過別以為所有酒也能驅寒，紅酒含大量單寧（Tannins），來自葡萄皮、葡萄籽，會令蟹的蛋白難以分解，影響消化。香片、普洱等黑茶，還有柿子、橙、桃、梨都是高單寧食物，食蟹時要避免同時攝取。

秋天蟹黃爆漿又甘甜，不過蟹始終寒涼又高膽固醇，少食多滋味，飲食還是均衡為好！